Published: 05-11-2024
پاک بحریہ کے جہاز پی این ایس ذوالفقار نے ریجنل میری ٹائم سیکیورٹی پٹرول کے دوران جبوتی کا دورہ کیا۔ پاک فوج کے شعبہ تعقات عامہ آئی ایس پی آر کے مطابق بندرگاہ آمد پر جبوتی کی بحریہ کے حکام نے پاک بحریہ کے جہاز کا استقبال کیا۔ آئی ایس پی آر کے مطابق کمانڈنگ آفیسر پی این ایس ذوالفقار نے میزبان بحری حکام سے ملاقاتیں کیں اور جبوتی کی بحریہ کے کمانڈر اورکوسٹ گارڈز کے ساتھ پیشہ وارانہ امور پر تبادلہ خیال کیا۔آئی ایس پی آر کے مطابق دورہ کے اختتام پر جبوتی کوسٹ گارڈز کے ساتھ مشترکہ بحری مشق کا انعقاد کیا گیا۔ آئی ایس پی آر کے مطابق مشق کا مقصد مشترکہ آپریشنز کی صلاحیت اور باہمی تعاون کو مزید بہتر بنانا تھا۔ پاکستان اور جبوتی کی بحری افواج کےدوطرفہ روابط دونوں برادر ممالک کے سفارتی تعلقات میں بنیادی حیثیت رکھتے ہیں۔ مختلف ممالک کے سفیروں، دفاعی اتاشی، جبوتی کی اعلیٰ سول و عسکری قیادت اور مقامی و پاکستانی کمیونٹی نے بھی جہاز کا دورہ کیا۔ آئی ایس پی آر کے مطابق اس دورے سے دونوں ممالک کے تعلقات کو مزید فروغ ملے گا۔
