Published: 07-11-2024
لاہور میں انسداد دہشت گردی کی عدالت نے نجی کالج میں مبینہ ریپ کیس کی متاثرہ طالبہ کی والدہ ہونے کی دعویدار خاتون کے جسمانی ریمانڈ میں 6 روز توسیع کردی۔پولیس نے متاثرہ طالبہ کی ماں ہونے کی دعویدار خاتون سارہ خان کو جسمانی ریمانڈ مکمل ہونے پر عدالت میں پیش کیا۔ تفتشی افسر نے عدالت کو بتایا کہ ملزمہ کا ایک موبائل فون ملتان سے برآمد ہوا ہے جبکہ دوسرا برآمد کرنا ہے، ملزمہ کی ویڈیوز کی جانچ کیلئے آواز میچنگ ٹیسٹ بھی کروانا ہے، اس لیے مزید جسمانی ریمانڈ دیا جائے۔عدالت نے استدعا منظور کر تے ہوئے ہدایت کی کہ ملزمہ جسمانی ریمانڈ کے دوران صرف دن کے وقت پولیس حراست میں رہے گی، اندھیرا ہونے سے پہلے اسے روزانہ جیل منتقل کیا جائے گا۔ملزمہ سارہ خان کیخلاف تھانہ گلبرگ نے مقدمہ درج کر رکھا ہے۔واضح رہے کہ گزشتہ دنوں لاہور میں طالبہ سے مبینہ زیادتی کے واقعے پر غیر مصدقہ خبر وائرل ہوئی تھی جس کے بعد لاہور سمیت پنجاب کے کئی شہروں میں طلبہ نے احتجاج کیا تھا اور توڑ پھوڑ کی تھی۔بعد ازاں تحقیقاتی کمیٹی بنائی گئی تھی جس کے مطابق کالج میں لڑکی سے زیادتی کا کوئی ثبوت نہیں ملا اور نہ ہی مبینہ زیادتی کا کوئی عینی شاہد ملا ہے، کمیٹی نے 28 کے قریب طلبہ اور طالبات کے انٹرویو کیے جس میں طلبہ اور طالبات نے بیان میں ادھر ادھر سے سننا بتایا۔کمیٹی کی رپورٹ میں بتایا گیا تھا کہ معاملے کو سوشل میڈیا پر پوسٹوں کے ذریعے اچھالا گیا۔
